Poezie

Calea

di Zicu A. Araia (1877-1948) (Un veac de poezie aromână - di H. Cândroveanu, K. Iorgoveanu)

1 min lectură·24 noiembrie 2011

Mediu

Ascăpăm di iarna greauâ,

Sus tu munts nu-armasi neauâ;

Cresc lilici, tindilina,

Ies armânjilji Samarina.

Ncarcă casili pri cărvani;

Calji tuts imnâ rivani,

Un spri un, - ti ljia haraua,

Mor cu elji tutâ dunjeaua.

Cilnicadzjlji trag nâinti,

Shi-aflâ loc mushat, cum prindi,

Tra s-nu-lji aflâ vârnu arău

Pristi noaptea-al Dumnidzău.

Di pri calji dipun hârăili;

Ia, ca-ndreapsiră sh-purăvili.

Soarli-ascapită; si-aproachi,

Tutâ lumea-i tu cunachi.

Featili cu bucla-n mânâ

S-duc s-lja apâ la fândânâ;

S-duc bârbats shi s-duc ficiori

S-mulgă oili plicâtori.

Tuts durnjirâ. Easti noapti.

Mash un cloput di oi bati.

Poate domnu-su li-adunâ,

S-doarmâ tuti dipriunâ.

Cârvânarilji gresc dadoara.

Tra ncărcari vini oara.

Ncarcâ calji tuts ca ieri,

Gionjlji armânji fâră ghideri!

Elji tut fug nâ sâptâmânâ;

Gionj cu feati s-tsân di mânâ;

Calea tutâ imnâ sh-cântâ,

Canda-i Pashti, canda-i numtâ...

Cum di mira nu n-alasâ

S njeardzim tu loc-nâ acasâ,

Tra s-bânăm ca tuts armânjilji

S-murim sh-noi ca tuts pâpânjlji?

002.759

Sima Mirela. “Calea.” Atelier, Poezie.ro, https://poezie.ro/atelier/sima-mirela/poezie/13994387/calea

Comentarii (0)

Autentifica-te pentru a lasa un comentariu.