Pirmith Mularea, luplu și vulpea

Unâ dzuâ cându vulpea imna pritu pâduri, u astâl’ie unâ mulari. Și, cum nu avea vidzutâ cânoarâ nâ mulari, s-aspâre multu și fudzi. Cum fudzea ea ași, na u-astâl’ie luplu. L’i spusi că vidzu unâ didip nauâ pravdâ ș-că nu știi cum s-cl’iamâ. Atumțea luplu dzâsi: - S-neadzim deadun, s-videm! - Ași s-dusirâ la mulari. Ea ș-a luplui âl’i si pârea ciudioasâ. Atumțea vulpea u ntribă mularea cum s-cl’iamâ. A mularea u mutrea vulpea, âl mutrea luplu și, cum s-aspârea s-nu-âl’i facâ țiva, apândâsi așiți: - Nu n’i-u știu numa a mea di pri minti. Ma maca a sâ știi s-dghivâseșțâ (s-aledz), mutrea-l ndreptul cicior a meu di dinâpoi, pi nâs scrii. - O, Dumnidzale, uhtă vulpea, io nu știu carti, ma voi sâ știu. - Alasâ-mi, atumțea mini, dzâsi luplu. Io mi achicâsescu tu ațea. Mularea âl’i lu timsi ndreptul cicior di dinâpoi, a guvojdzâli di pi petalâ undzea niheam pi yrami. - Nu li ved ghini yramili, dzâsi luplu. - Atumțea, yinu ma aproapea, apândâsi mularea, că yramili suntu multu n’iț. Luplu vini ș-lu apruche caplu ta s-li veadâ ma ghini yramili pi cicior. A mularea lu-agudi cu ciciorlu ahât sânâtos ți el câdzu mortu mpadi. Vulpea dinâoarâ fudzi, a pitu cali ș-dzâsi: - Pânâ ș-nvițatlu nu easti duri mintimen.