Poezie
Treia carti trâ armânj
3 min lectură·
Mediu
Chirolu curâ pritŭ noi neutru
cu lumea ligată dupu el ishishi,
ca un dicunjear tsi sh dutsi furtia.
ama noi u videm isturia ca unâ privideari,
ahtari turlii că noi ishishi pârem
s avem unâ simasii cama mari.
dapoaia, ca tuti s nu hibâ unâ dramâ,
chirolu angricat di shteri easti mash unâ conventsie
tamam prit matematica a lui.
voi adunats fârâ dânâseari,
tu unâ asparizmâ lishor te a exiyiseari,
sclâvia fatală vâ arâdi că vâ hits a voauâ niuchiri,
ma, dealihea, vâ hits a voauâ ishishi sclayi.
canda nu shtits că vlihuria di nafoarâ
easti mash unâ iluzii,
furnjii ti oaminji ta s va niscânti fapti,
vlihuria dealihea easti mash tu sinea ishishi,
tsi angreacâ ma multu di itsi nom martsial.
ghineatsa la un insu nu easti ghineatsa a farâljei,
sh suma a ghineatsâljei singularâ nu va s hibâ canâoarâ
unâ ghineatsâ ti armânami.
tsi adrats un ti alantu?
iu easti andâmusearea comună a ghineatsâljei a voastâ?
ta s nu hibâ bana stearpâ sh bânatâ fârâ noimâ...
tora, cu murafetea a voastrâ veaclji,
vâ dats dupu tut tsi easti efemer,
câtse vâ dânâsitu s vâ dutsets câtâ eternitate?
tsi s featsi tu voi di vâ agârshitu
sh tora bânats mash bana a alântor?
nu ari multu chiro di anda,
tu loc di sândzâ, purtats tu vini scupadz,
ti atsea lj duruseats sh ahât lishor a curi sâ s tihisea.
tu loc di ininj, gailelu ti isnafi bâtea dipriunâ
anamisa di coastili a voastri di bâcâri, clopati yii earats.
adzâ, ideallu a vostru easti avearea, mâcarea,
discurmarea sh gimbushea,
purtaticŭ lishorŭ di yeatsâ.
armasirâ tu pirmithi, tsi li adrats abstracti,
hâirea sh ca tsi soĭi hits.
vâ pripusit s bânats mash tu isturiili a voasti,
va vâ agiungâ ahâtŭ?
sh a nipotslorŭ a voshtsâ va lâ agiungâ?
cari va lâ aspunâ că tu chirolu dit soni
nu mata ari curbani,
tsi va s dzâcâ urnechi, simbolu sh cali te a imnari?
tu limba armâneascâ,
pistipsits că nica ari minduiarea armâneascâ?
nu mata purtats ni idealurli a alântor, ta s aspunets
cu câtâ silâ putets s vâ shtsâts la sinferurli a lor...
natsionali.
elenismu, panslaismu, românismu di voi dispârtsâtŭ,
i mash arbinishiri.
nu vâ easti arshini anda ghivâsits tu cărtsâ pârghisiti
tsi pâpânji anyilicioshi avut?
colasea dit prezentlu a vostu nu s cutreamburâ anda shadi
arada di aesti lunjini?
nu duchits că ei suntu a voshtsâ, că suntu fâr’ di moarti
mash ahât chiro cât voi va s bânats, că elj hits voi?
pistipsits că ei bânarâ ta s avets voi tsi s vâtâmats tora,
i că murirâ ti unâ ahtari moarti, inshitâ dit voi?
adzâ,
vahi di arshini, nu mata vrets s ghivâsits sh s anyrâpsits,
vahi ta s nu anvitsats câtâ giuneatsâ putea s ancapâ tu
picurarlji atselj,
tsi sh anda dipunea di analtu, dipunea mash ta s mutâ,
fârâ zori civilizatsiili a alântorŭ.
tsi zurleatsâ stelarâ vâ vigljea genetica a voastâ,
tsi gesturi, tsi furnjii!
s lu alashi ti ma amânatu lucurlu easti tora
arâhatea a voastrâ fârâ dânâseari sh intimâ,
canda vâ easti fricâ
di unâ dipiseari conventsionalâ ali isturii,
atsea tsi easti dealihea, cum tsi s hibâ, nu ari dânâseari.
avets asparizma a atsilui tsi easti pi dzâli xeani sh ljŭ fricâ
s minâ pi cârvati anda moari...
007.922
0
Despre aceasta lucrare
- Autor
- Marius Marian Șolea
- Tip
- Poezie
- Cuvinte
- 542
- Citire
- 3 min
- Versuri
- 75
- Actualizat
Cum sa citezi
Marius Marian Șolea. “Treia carti trâ armânj.” Atelier, Poezie.ro, https://poezie.ro/atelier/marius-marian-solea/poezie/14019210/treia-carti-tra-armanjComentarii (0)
Autentifica-te pentru a lasa un comentariu.