Poezie
Daua carti trâ armânj
3 min lectură·
Mediu
Ahâtŭ ptsânj suntu atselj tsi au sinfer ti averŭ
că ti antreghi desi ari vârâ noimă
s-angăsăieshtsâ ta s-bânedz ti elj.
averlu – un ambodyiu a fudzeariljei dit omŭ ti voi –
s-pari ta s-hibâ di fisico abstractu.
armânj, tut cama singuri tu voi ishivâ
câtâ cumŭ a voastâ chireari ti sinferurili a lumiljei,
nu-avets ananghi ni di văsilii, ni di locŭ
ta s-vâ angrupats, ngrânjia anamisa di voi fu duri
ta s-vâ aputruseascâ di dip.
geaba vâ dats mânjlji ncorurili a voasti,
nu mata ngârdits ici tsiva.
deanvârliga a voastâ, zborlu easti fârâ uxii,
u chirutŭ noima,
grearea easti mash unŭ sonŭ ali biologhii.
stiznji di carni, azvurnuiti tu suflit,
anamisa di voi ânj si pari că mash di sumŭ locŭ
potŭ s-vâ grescu cu hâiri.
arâvuiri a lucârlor tsi li shtits di voi,
ti ghineatsa a voastâ curbanea nu agiundzi,
ti ghineatsa a voastâ
tsiva nu poati s-hibâ adrat maca atsel tsi adarâ
nu ari unâ mirachi zurlâ ti vrearea di voi,
ti tabaetea atsea tsi u aveats vârnâoarâ sh-dit cari armasi
mash nostalghia a ducheariljei niastimtâ.
bânâtori ti anami a iluziljei a elefteriljei,
dzăts di dzei njicâzantsâ sh cu zâvalâ vâ apufâsescu mira.
un mecanismo psihologhic nitinjisitu vâ dusi
dit volea solitarâ tu câsurea solitarâ.
pânâ sh-bana a mea easti unâ moarti dipriunâ a voastâ,
câtse tu mini duchescu
cumŭ s-neacâ atsel dit soni armân,
tu sândzul românescu.
vâ easti andirsi s-hits oaminj,
caftu tu ininjli a voasti chirolu greu, nu-lŭ aflu,
nu shtiu zborlu cu cari s-vâ scotŭ dit aesti murminti.
nu voi s-nvetsŭ s-vâ anyrâpsescu crutsea,
ti atsea că, fârâ di voi, nitsi mini nu mata escu.
tu limba niagârshită,
agiumtâ kiola eternâ la un di capitli a elj
adzâ nu mata spunets ici tsiva, fisea armâneascâ-i amutâ.
suflitli a strâ-aushlor a voshtsâ, ligati adzâ tu voi
sh-tsi, aua sh-un chiro,
avea cânâscutâ lumea anamisa di niorilji a muntsâlor
sh-haraua a corurilorŭ di existentsâ sh-di xanaaflari
tu văljiurli tsi aduna analtili căljiuri, li purtats tora
tu gimbushi psefti sh-andamusi lishoari
prit sumlocurli apreasi di Bucureshti.
suflitli a aushlor a voshtsâ anăltsâ
sh-haraua a lor ta s-hibâ deadun, li silighits tu chisâ,
tu unâ colasi nicânâscutâ vârnâoarâ di elj.
sh-nu mash că bânats aclo unâ paljiu comuniuni
di banâ,
adrats nica sh-spectacoli,
ta s-veadâ dunjeaua că avets tsiva ti-aspuneari...
dit identitatea a voastâ armasi mash unâ sârmâ
di emotsie.
cu armânili tiniri vâ purtats
dip canda suntu nâscânti putani
tsi sh-aflarâ apanghĭu ninga voi dit mărdzinjlji a fisâljei.
ti atsea că nu mata hits ici tsiva, ta s-tsânets ziga,
cilâstâsits ta s-avets cât ma multu, s-anvâlits ashi
gollu cu ponŭ tsi vâ surpâ tu xichea di noimâ.
bânats ti canâ,
ti atsea că s-bânedz ti tini ishish nu va s-dzâcâ ici tsiva.
atsea hari tsi s-pari că u tsânut pân’ tora
easti că nica bânats, ama aestâ nu vâ si cadi a voauâ ici,
easti atsel dit soni torŭ a atsilor
a curi lâ hits borgi ti anami, livindeatsâ
sh-eternitati...
dit tuti nu achicăsits ici tsiva.
hits ma nghiosŭ di loclu tsi-lŭ câlcats,
dizlâxits di lunjnâ, alâxits tu locŭ.
analtul sh-azbuirarea canda nu furâ dip.
sh-muntsâlji ditŭ sinea a voastâ suntu golj.
hiindalui fârâ di hâiri tora, vâ pâryisirâ sh-dushmanjlji...
traducere de Mirela Sima și Aurica Piha
003.342
0
Despre aceasta lucrare
- Autor
- Marius Marian Șolea
- Tip
- Poezie
- Cuvinte
- 541
- Citire
- 3 min
- Versuri
- 77
- Actualizat
Cum sa citezi
Marius Marian Șolea. “Daua carti trâ armânj.” Atelier, Poezie.ro, https://poezie.ro/atelier/marius-marian-solea/poezie/14018406/daua-carti-tra-armanjComentarii (0)
Autentifica-te pentru a lasa un comentariu.