Poezie
Armâne, fârâ tini yiu, crutsea va tsâ hibâ xeanâ
2 min lectură·
Mediu
Armâne, gione, tsi ti-ai minduitâ că va tsâ ânyrâpseascâ pi crutsi?
istoria i chirerea a ljei? haraua ti bânari i drama dealihea?
agârsharea-ts, zdruminarea a hiintsâljei a tali analti, niduchearea di sini?
agiundzi că ânyrâpseashti pi ea că bânashi eti arada
sh-murishi dip azâ, anda bitisita tsâ easti aproapea?
i minduieshtsâ că easti duri că bânashi ma multu sh-di bana
dit cântisli a tali? nu, bre gione, moartea-i moarti mash cându yini dit tini.
nu adarâ unâ armâsâtura a adyaticlui a tău cu bana armâneascâ!
sh-ma multu, cari minduieshtsâ că va tsâ ânyrâpseascâ azâ pi crutsi?
gretslji, tsi ti adusirâ ta s-tsâ vedz sândzâli-ts dit cheptu,
câdzândalui pi chetsarli a lor stearpi,
cândâsearea dit soni că tini hii greclu mortu sh-vechilju di cari au ananghi
ta s-poatâ s-curdiseascâ tu horli a tali?
tu inimâ cât chiro va li portsâ blâstemlu sh-inatea?
sh-di cându aprochi tini ca psemata dit istoria a lor s-ahurheascâ cu tini?
agârshishi că ochilji a tăi vidzurâ atsea dit soni lunjnâ
ânyilicindalui pi câtsutlu a antartlui grec,
tsi s-hiumâsea tâbâbii dit curii sh-dit episcopii?
agiundzi mash ahât, s-tsâ dzâcâ că eshtsâ livendu grec,
ta s-acats s-plândzâ pi limba a lor?
cari, more, va tsâ ânyrâpseascâ pi crutsea-ts? românjlj,
tsi tsâ grirâ, casten, ta s-ti agârsheascâ,
iu ti chirushi totna nuntrul a lor acâtsat di turbu?
arbineshlji nturchipsits, tsi s-pirifânsescu,
anda calcâ pi murmintsâlj a strâpâpânjlor a tăi?
sârghilji, vâryarilji, cari, more, va tsâ ânyrâpseascâ pi crutsi?
i Machidunia, tsi va ti agârsheascâ, tut cama multu,
minduindalui că, fârâ tini, va s-poatâ s-hibâ mash unâ istorii slavâ?
cumândarilji a tăi, ampârtsâts tu parei dushmani sh-cari, fârâ di tini,
nu suntu ici tsiva?
tsi pot ljei s-tsâ spunâ? tsi lunjnj acâtsarâ tu mutritâ sh-tu pălnj,
ta s-ti mutreasacâ-ntr-oclji shi s-ti acatsâ di-anumiri? câti steali au apreasâ,
ta s-ti scoatâ dit scutidea atsea aratsea?
gione, s-nu mori, tsi cara azâ va tsâ adarâ crutsea-ts,
câ tse nu-ari cari, more, s-ânyrâpseasacâ pi ea „Armânlu nu cheari!”
007.949
0
Despre aceasta lucrare
- Autor
- Marius Marian Șolea
- Tip
- Poezie
- Cuvinte
- 325
- Citire
- 2 min
- Versuri
- 35
- Actualizat
Cum sa citezi
Marius Marian Șolea. “Armâne, fârâ tini yiu, crutsea va tsâ hibâ xeanâ.” Atelier, Poezie.ro, https://poezie.ro/atelier/marius-marian-solea/poezie/14013334/armane-fara-tini-yiu-crutsea-va-tsa-hiba-xeanaComentarii (0)
Autentifica-te pentru a lasa un comentariu.