De letzt Blechmusikant

Die Sunn hängt schun tief iwer de Heiser. De rumänisch Pope singt e Litanei vor’me uffne Grab. De Vedder Lasi spillt e altes Todelied uf seiner Trumpet un die Todegräwer losse die Lad nunner. De Pope hot sei Arwed gemach un geht hoom. Aah die Todegräwer sin ins Todeheisje gang, ehre Werkzeich holle. De Vedder Lasi bleibt noch. Er steht ganz lonich vorm Grab un werft e Scholle uf die Lad.

Schun vor meh wie sechzich Johr hot er do uf dem Kerchuff Leichte gspillt. Selmols ware norr wenich Rumänre im Dorf. Em Vedder Lasi sei Eltre hun aah dezu gheert. Sie hun ehre kloone Bu in die deitsch Schul gschickt un in die Musikkapell. Er is mit de Deitsche ufgewachs un vun de junge Johrgäng im Dorf ware vill, die hun gar net gewisst, dass er gar ka Deitscher is.

Die Blechmusik is’m schun frieh ans Herz gewachs. Uf unzähliche Hochzeite, Kerweihe un Leichte hot er gspillt. Die Faschingszeit mit ehre bekannte Musikantebäler werd er nie vergesse känne.

Un no sin die siebzicher Johre kumm. Immer meh Deitsche sin ausgewannert. Die Musikkapelle, die wu vor paar Johr noch de Musikantekriech gfehrt hun, sin immer schwächer wor un hun sich ufgeleest.



Er is geblieb, de Vedder Lasi mit seiner Trumpet. E langes scheenes Musikantelewe hot er hinner sich. Awwer oft hot’r aah des Lied „Ich hatte einen Kameraden“ blose misse. Wann er die Melodie mol brauch, werd nimand meh do sein, wu se forr ehne blose kann. Ob die ville Musikkumrade, die wu in Deitschland sin, iwerhaupt noch an’ne denke?

Die Todegräwer hun’s Grab zugscherrt un sin aah hoomgang. Die Sunn is schunn hinner der Landstroß unnergang. De Vedder Lasi steht ganz lonich uf’m Betonkerchuff. Der tot Mann im frische Grab war de letzt Deitsche im Dorf. Sei Ongeheeriche hun ne vor e paar Johr zrickgeloss, weil er em Trinke verfall war un nimand des ville Geld forr sei Ausreise vorstrecke hot wolle. Jetz is er gstorb. Im Suff. Un e walachischer Pope hot ne begrab.

Em Vedder Lasi laaft e Trän iwer de Backe. Er bet e deitsche Vaterunser... un speert, dass er alt un mied is. Langsam hebt er sei abgegriffni Trumpet un bloßt forr’s letzte Mol „Ich hatte einen Kameraden“.


[Uf der Schanz, 1999]