Di cum tricum deadun unâ dzuuâ ditu bana armânjlor

Cu harauâ, cu vreari sh-cu tinjii unu ti alantu – ashi tricum nica una dzuuâ ditu bana noastâ. Spectacolu tu limba armâneascâ cu numa pi româneshte, “O zi din viața aromânilor”, s-dizvârti Custantsa, tu amfiteatrul “Aula Magna” di la Universitatea Ovidius. Easti unâ piesâ muzicalâ di teatru, unâ premierâ tu cultura noastâ armâneascâ, adratâ di Asociația Europeană Interaxe, cu unâ parelji di studentsâ, dupu minduiarea ali Steliana Duliu-Bajdechi. Spectacolu ascoati tu migdani realitatea di adzâ, cu unâ limbâ misumoartâ, alâsatâ agârshitâ di nai multsâi di noi, cari ahurheashti peanarga s-hibâ azburâtâ ma ghini di alti milets. Easti un bairu di zboarâ vecli ausheshtsâ, ma shi puizii ditu literatura clasicâ armâneascâ – "Steaua chiruta", di Kira Iorgoveanu-Mantsu, “Foartica” alu Nicolae Batzaria, di cântitsi vecli di la hoarâ, deadun cu muzica noauâ armâneascâ ali Corina Elena Badea. Riscantă aventură, va s-dzâcâ mucanlu, ama doara tinirlor teatrinji (naima multsâi di iei români) shi buna minduiari a spectacolui evitarâ kitschlu. Gioclu armânescu fu aspus cu murafeti di pareia di elevi armânji di la litseulu Mircea cel Batrân, tu cari s-alidzea un tiniru liyundar bijduveanu, di-alu Rida. Pareia easti cumândusitâ di duruta Mirela Goga di la Fara Armâneascâ. Easti un succes nu mash artistic,ama, ashi cum minduiescu mini, s-aspuni dealihia cum nâ bânămu adzâ, catandisea tu cari him. Spectacolu adusi deadun tu sala armânji di multi parei sh minduieri, cari bâturâ tuts pălnjili cu idyia miraki. Tinjisirâ spectacolu mări artishtsâ tsi îi deadi miletea noastâ tu cultura română, ma sh-oaminji ditu politicâ tsi cumândusirâ cultura ditu România: Stere Gulea, Ion Caramitru, Puiu Hashotti. Deadun cu profesori shi cu studentsâ, cu jurnalishtsâ, furâ tu salâ shi oaminji di la sutsatili armâneshtsâ. Una fânârseari ti ciudii fu Pero Tsatsa ditu Makidunii, ca vârâ Pitu Guli anyiatu ditu moarti, cari fu tinjisit multu di armânjii aplo, di aradâ. Bircheavis a tinirlor teatrinji, ali Steliana Duliu Bajdechi shi, nu dip tu soni, a oaminjilor mări tsi s-ashutsârâ, ti una dzuuâ, câtâ miletea ditu cari vinirâ pisti locu. Tricum cu vreari unâ dzuuâ ditu bana a noastâ. S-nâ aduca Dumnidză noi tuts s-li tritsemu tut ashi sh alanti dzâli ditu anu. Puiu Bajdechi